《智齒》畫面細膩震撼的實力派演技秀
事前已知道《智齒》是黑白拍攝，但仍逃不開親眼於大銀幕睇到嗰種震撼。《智齒》並非如《 Sin City 罪惡城》那種讓人長時間睇得好辛苦嘅高反差漫畫式黑白畫面，相反地《智齒》的黑白畫面可以令人睇得舒服嘅情況之下帶出畫面嘅細緻以及質感，而且睇得出影片花了大量心機堆砌有層次感嘅複雜場景，畫面質感實在少見，而且響《智齒》畫面之下亦更加能夠突出演員嘅表情變化，有幾個shot我睇完先發現，原來我從未試過咁近距離去睇清楚林家棟嘅表情變化😂
演員表現亦係可圈可點，除咗林家棟一慣高水準演技之外，最驚喜反而係女角劉雅瑟，演出收放自如而且去到好盡，本身故事應該林家棟係上把位而劉雅瑟是下把位，但竟然劉雅瑟比
林家棟更加搶鏡，你有幾可見到林家棟俾人搶戲？今次真係要睇吓喇😁 睇返資料原來劉雅瑟年紀已經唔細，但電影中嘅表現完全說服到我佢係一個十幾歲嘅靚妹… 以後真係要多啲留意呢個女演員
總括嚟講，《智齒》其實淨係畫面嘅心思以及演員嘅表現已經值得大家入場，而且港產片已經唔多，咁有心機嘅更加少，實在難得！
頁:
[1]