PlayStation®4 (PS4™)香港發佈會現場實況

@肥狗仔@ · 發表於 2013-11-11 21:16

如果想睇到更多76師兄嘅分享，快啲登入成為會員啦！

您需要登入收看或下載更多內容。還未成為會員？成為會員

x

本帖最後由 @肥狗仔@ 於 2013-11-11 21:39 編輯

“打機”文化歷史悠久，時至今日想話搵個冇接觸過電子遊戲嘅80後可能比中六合彩仲要困難。即使係食開樹皮﹑玩慣毒蛇嘅Post76仔女，對於當年瘋魔全球嘅紅白機，或者比較近期嘅Wii都定必唔會覺得陌生。而喺過去嘅11月7號，一部千呼萬喚嘅最新家庭遊戲主機就喺西九龍Sky100，招開佢同香港玩家嘅首次零距離接觸儀式，並公佈本地的發售日期。哩部遊戲機就係Sony次世代主機PlayStation 4(PS4)。@肥狗仔@和阿定版主早前就獲主辦單位Sony Computer Entertainment Hong Kong Limited(SCEH)邀請出席是次發佈會，有幸親眼目睹PS4的風采。

當日下午一點半，大批傳媒包括本人與定兄已經擠滿咗整個平日供遊客參觀嘅”天際100”觀景台。唔洗一陣，擔任MC嘅DJ Donald就為大家請出發佈會的第一個嘉賓 — 藝人黃美棋(MeiKi)。MeiKi先前參與咗同為SCEH舉辦的「PS4黑夜行動」，與二百多個PlayStation fans合力以身體堆砌出全球最大的PS4專用手制DualShock4(DS4)，大破健力士世界紀錄「最大型人造遊戲控制器」。MeiKi表示自己有份參加這次創舉感到十分高興，而DS4的”製作過程”亦好有趣又有意義。

未宣佈有關PS4消息前，Donald首先請來城中女神與荀盤 — 蒙嘉慧(YoYo)及陳豪(Moses)分享自己在電子遊戲上的戰績。雖然兩人都已經成家立室，但依然無損對打機的熱愛。特別係YoYo，其丈夫鄭伊健就係個出哂名嘅超級機迷。對此，YoYo講笑咁話出席今次活動其實係伊健叫佢黎”探風”的。至於就快做人dady嘅陳豪，被問到會否叫Mo仔打機，陳豪笑哂口咁話哩類親子活動可以增進親子關係，仲表示自己係PlayStation家族的長期支持者。話口未完，大會就安排咗位小朋友贈送DS4手制俾兩人進行合照，認真窩心。

接著落黎，輪到SCEJA副行政總裁織田博之先生上台。織田先生以一口流利普通話向大家問好然後開始一系列重要的PS硬件發表。首先其宣佈全新型號PlayStationVita(PSV)將於11月14日推出，售價HKD $1,680。而對應PSV，並能夠將PSV視頻訊號輸出到電視的PSV.TV亦於隔日的11月16日推出，售價分別為HKD $798及HKD $1,180(連DualShock3手制)。

最緊張嘅時刻終於來臨，織田先生聯同YoYo﹑陳豪一齊宣佈PS4將於12月17日喺香港地區全面發售，與南韓等地同為亞洲最早發售的地區之一。而售價就更加令在場人士喜出望外。一部PS4連手制都只係HKD$3,380兼唔洗硬食遊戲，相比當年PS3的天價明顯親民得多。首發當日亦會有23款遊戲(七款中文遊戲)為PS4護航，包括《Killzone: Shadowfall》,《KNACK》, 《Driveclub》等獨佔大作。同日還會推出三款主機同梱套裝: “PS4™《真．三國無雙7 with 猛將傳》同梱裝(HKD$3,880)”, “PS4™ 及PS Camera 同梱裝(HKD $3,680)” 及 ” PS4™《Killzone™ Shadow Fall》同梱裝(HKD $3,780)”。當然，唔少得直立架﹑充電器等一系列周邊產品供玩家選購。

之後SCEI策略及產品設計部門經理青木俊雅上台邊演示PS4遊戲《KNACK》，邊介紹PS4的獨有功能和全新介面。玩家可以通過嶄新社交互動方式，利用DS4上的”share”鍵將你的精彩時刻即時上載到PlayStation Network或Facebook與朋友分享. 亦可以在中途暫停遊戲，進入官方主題上查看攻略出奇制勝。

完成PS4的基本功能介紹後，SCEI WWS Japan Studio高級程式員橫川裕緊接為在場傳媒示範PS4首發體感遊戲《THE PLAYROOM》，展示了PS4體感設備PlayStation Camera(PSC)。在《THE PLAYROOM》遊戲中，PSC的傳感器會偵測DS4手制上的Light Bar位置來將之定位，並在螢光幕上顯示連串AR影像，互動十足。而遊戲雖則圍繞與機械人之間的糾纏，但玩法千變萬化。由打水杖到純粹與機械人交流的有趣體驗都有。玩家更可以同家人朋友一齊對戰，歡樂倍增。

若果你對先前的兩款作品都提唔起興趣，咁以下落黎由製作人鈴木亮浩親先介紹的《真•三國無雙7 with猛將傳》肯定令你精神為之一振。憑PS2起家的《真三》系列已經黎到第7^n集，利用咗PS4的強勁機能，今集無論係人物多邊型，定係貼圖都係前所未有的高品質。再加上每秒60格的流暢運行，可以講本作一定係全系列最”爽”嘅一集。介紹去到尾升時，鈴木先生更揭露自己的生日和本作發售日係同一日。若然遊戲大賣，咁鈴木先生就真係收到一份幾難得嘅生日禮物。

完成所有制作人介紹後，當日嘅發佈會正式完結。@肥狗仔@二話不說地衝到試玩區，唸住先人一步體驗吓次世代嘅威力。點知去到至發現原來好多人都有相同唸法… 等咗大約3~4分鐘，@肥狗仔@終於見到嗰部外型與PS2厚機有幾分相似的PS4，拎起咗DS4手制，與《Killzone Shadow Fall》嗰堆山寨白兵交火。第一個感覺係DS4比上一代於手感方面有好大進步，特別係柄位完全掉棄咗前三代的”短腳鴨”設計，改用類似PS MOVE的”大雞脾”。感覺更穩重更好就力。特別玩FPS，長時間遊戲都唔覺得攰或者唔適應。而L3與R3類比按鍵則首次採用形狀較細嘅”半凹菇”設計，母指較以往更容易擺動類比。但講到尾@肥狗仔@最關心都係L2與R2等”開火”專用按鈕。經過一輪試玩之後坦白講個人仍然唔太滿意。與DS3的”油門”相比，DS4只係一個冇咁難踩嘅油門。論射擊感該手制仍然及唔上XBOX360的手柄設計。

講返隻game，今次《Killzone Shadow Fall》轉戰到一個陽光充沛的繁華大都會。主角一開始要衝入其中一座大廈，從敵兵手中救出人質。遊戲繼承咗系列一貫的超高水準畫質，所以即使任務在身，細緻生動的城市美景亦會讓人再三欣賞。比較遺憾係本作的室內場景除咗光影渲染之外，整體都冇太大的畫面飛躍。不過作為PS4首發遊戲，論今次現場DEMO表現，《Killzone Shadow Fall》仍然係跟機嘅不二之選。

@肥狗仔@之後又試玩咗動作遊戲《KNACK》。哩款PS4首發遊戲由負責過《Jak And Daxter》及《古惑狼》系列的鬼才製作人Mark Cerny所監督。上手感覺係操作非常簡單直接，主角Knack由唔同細小元件所組成。玩家可以從補給箱收集元件增強Knack的體格及破壞力。相反，被敵人攻擊得呈就會馬上造成元件脫落直至gameover。而每一粒構成兼圍繞Knack身體的元件都有明顯的物理效果，並跟隨角色動作產生相關變化，係種頗為有趣的視覺體驗。起始時Knack的基本招數一般都係幾個板斧: 拳擊，跳躍攻擊﹑還有閃避。而後期則可以使用五花八門的特殊技能。以DEMO為例第二關玩家可以發動隱身能力去避開紅外線監視器。簡易的玩法配塔清新的畫風，哩款應該係當日最令@肥狗仔@印象深刻的PS4獨佔作品。

自SONY公佈PS4首發遊戲名單以來，其中一款獨佔賽車作品《Driveclub》一直被外界質疑有”倒米”之嫌，皆因其發售日與PS3王牌賽車大作《Gran Turismo 6》撞到應一應。至於係咪代表《Driveclub》唔值得留意，咁又未必。雖則@肥狗仔@對於賽車game的喜愛程度極其量只係去到playback環節，不過遊戲的實機畫面的確係令人眼前一亮。齋睇精細的車身和賦真實感的反光效果已經癮到人恨不得將架靚車”據為己有”。

除咗三款獨佔中文版遊戲之外，會場仲設有唔少同樣吸引的PS4首發遊戲試玩，例如發佈會有展示的《真．三國無雙7 with 猛將傳》，還有Ubisoft年度大作《Assassin’s Creed IV Black Flag》(AC4)以及2K招牌運動遊戲《NBA 2K14》(2K14)。其中AC4和2K14的PS3/X360版本雖然早已推出市面，但PS4版無疑盡顯咗有關遊戲的極致畫面。根據全程喪打2K14的阿定版主所言，今次PS4版除咗更清晰之外，場外觀眾的貼圖細節更係無可比擬。若果你以為自己玩開嘅PS3遊戲係高清嘅話，咁PS4就正好話俾各位知道咩叫做真正高清遊戲享受。

隨著PS4將於本月15號(北美) 搶閘發售，標誌著第八代電子遊戲機之戰正式展開。作為亞洲地區，香港可以比日本或台灣等地更早推出主機可以話係本地玩家的一大喜訊。參與完是次盛大的發佈會後，@肥狗仔@深深感受到SCEH對PS4在本港發售的野心及所付出的努力，亦期望哩部次世代主機可以為一眾機迷帶黎獨一無二嘅遊戲體驗。

*有關港版PS4的發售/預訂資訊可參考以下官方新聞犒:
http://post76.hk/forum.php?mod=viewthread&tid=173619&extra=page%3D1

當日大會贈送咗唔少紀念品俾到場傳媒，哩個PlayStation 4 USB手帶就係其中之一。有興趣的Post76版友可pm@肥狗仔@。小弟將會安排一個簡單任務俾有意者，完成後就可以獲得相關禮物。

至於另一個紀念品就犀利囉。係會場限定外置USB充電器。

睇真啲原來上面仲刻有”Post76”字樣。名貴程度不可估算。嗯，突然有種私藏國家財產嘅感覺。

Post76新聞中心原文:
http://www.post76.com/wordpress/?p=46859