CD一定比有損DL好？hi-res係音質保證? 事實上又係唔係咁？

nanaholic

任何音響論壇一定成日見到有新人請教嘅時候就會有一班人叫人要轉用無損或hi-res先可以達到靚聲唔會曬咗器材嘅說法，但其實事實上又係唔係真係咁呢？

首先討論之前先有一個好重要嘅概念我認爲每一位燒友都應該要識 - 就係clipping.

Clipping - 中文就係指"拆音"或"爆音"。原因好簡單就係在增大輸出的時候大過儀器的功效，那波形中高過儀器功效的地方便會被強逼斬去令到波形走樣，因此聲音也就變了。舉個例，如果你有架靚靚四驅車係2m高，但係比你出去個門口得1.5m, 你唯有斬咗你個車頂出去，雖然係比你出咗去但你架靚車就走曬樣唔再靚，音樂clipping就係咁！音樂嘅clipping的發生可以係先天或後天 - 後天就好簡單, 你張vol開到最大/接近最大一定會clip/拆的，但你自己一般唔會用到咁大聲因爲你會耳聾，所以後天拆音基本上係唔需要理會同係研究範圍外。而先天clipping嘅發生係係音樂製作上出現 - 例如混音師係錄音的時候推多咗d vol過咗錄音儀器嘅功效就會錄咗已拆嘅波形入去，而呢樣嘢係之後冇得救返嘅，因爲失去咗嘅訊息係冇得100%還原。先天拆聲其實就好似你將最靚嘅食材比咗一個新手廚師去炮製一樣 - 就算你d食材有幾靚幾新鮮，個新手廚師都係整咗地獄料理出嚟你係食唔落口嘅，而且亦都唔可以將地獄料理還原變返靚食材，結果就只有遺憾同浪費。

好啦，講咗咁多又有咩關係呢？關係就大了！其實依家好多市面上嘅流行曲係有先天嘅拆聲的！而想知道點樣其實係有辦法的！有一個免費軟件叫audacity, 只要你將音樂檔放入去佢係會可以將clipping部分用紅色顯示出來。簡單嚟講紅色越少就越好。舉下例子:



上面好多紅色嘅就係唔靚嘅波形，相反下面全部藍色就very good啦！

呢張圖有一個有趣的地方就係佢正正反映出我講嘅地獄料理例子。其實呢兩個波形係屬於*同一首歌來的*(雨宮天的Velvet Ray)，而且兩者嘅規格都係24bit/96kHz嘅hi-res file. 唔同嘅地方只係上面的與下面的係來自唔同嘅CD版本(上面係hi-res single版，下面係hi-res album版)。簡單嚟講就係將同一個食材同食譜一邊比咗新手而另一邊就係米芝連廚師嘅分別。呢個例子就首先證實咗比大家知道其實hi-res都絕對可以衰聲的。

又嚟一個例子。


呢次係LoveLive的首本名曲Snow Halation唔同版本嘅比較. 最上面的係"hi-res" single版本(其實也只有48kHz而已，沒比CD的44kHz多很多)，中間的係CD single版，而最下面的是CD Best Collection版。呢個例子可以再一次見到就算規格一樣係無損，後製錄音其實係可以做壞一隻歌的。而你係唔可以單從檔案格式係"無損"，CD/hi-res等就斷定那一個版本會比較靚聲!

好啦好啦，咁無損對有損就一定無損嬴啦！

未必!

又係同一首歌 - TrySail的whiz
mora - mora下載版aac 320kbps的有損版
CD - 大碟收錄版本
single - single收錄版本

事實竟然係aac版本拆聲係最少的！ 又一鐵證其實唔係格式而係混音後製先係最大左右音質嘅要素。

所以成日見人盲目講話要聽一定係hi-res無損同一定好過有損。錯！要靚音其實係要搵靚混音而唔係搵靚規格先係真道理。好可惜嘅係我哋係冇辦法可以係購買前預先知道呢d訊息，所以如果你真係追求嘅話，準備科水所有版本都買一次嚟聽吧！

Ccs56084342

同意，制作比格式重要。

WillsonLaw@FB

snow hala有32bit同24bit版⋯⋯你攞左邊個ver ?

lisztian

好似偏離重點，呢篇文係講出制作唔好會有幾大影響，同HI 唔HI RES冇關係。

咁CD都同CD比都可以衰聲，完全得唔出格式分別做成效果好左/差左既結論

同埋AAC最少拆聲只係佢既運算法有做adjustment，唔係咩唔拆/好聲既"鐵證"

nanaholic

WillsonLaw@FB 發表於 2016-10-14 00:04
snow hala有32bit同24bit版⋯⋯你攞左邊個ver ?

24bit. 我買嘅時後未有32bit

nanaholic

lisztian 發表於 2016-10-14 10:35
好似偏離重點，呢篇文係講出制作唔好會有幾大影響，同HI 唔HI RES冇關係。

咁CD都同CD比都可以衰聲，完全 ...

個結論重點咪正正就係hi－res一樣可以衰聲，無話hi－res/無損/CD一定好咗或差錯囉

正如雨宮天隻velvet ray嘅例子，hi－res如果係製作嘅master上已經先天拆咗聲，並唔會因為佢個規格係hi－res而好聲咗，因為佢原本single版本個波形已經拆咗聲失曬真。如果我將下面靚版本嘅velvet ray下降成CD規格的44.1kHz取樣甚至用埋有損壓縮情況就會好似trysail隻whiz咁，會係有損壓縮先反而係波形最靚嘅版本同靚過CD, 而且會好聲過有拆聲嘅hi-res single版。

lisztian

nanaholic 發表於 2016-10-14 10:50
個結論重點咪正正就係hi－res一樣可以衰聲，無話hi－res/無損/CD一定好咗或差錯囉

正如雨宮天隻velvet r ...

咁冇意思，同樣一塊和牛，你搵酒店大廚煎到香噴噴。再搵茶記學徒煎到又燶又老。

之後大大聲話，和牛都可以好難食。呢個係犯左命題同結論不相關既邏輯謬誤。



你可以話和牛咁肥，好膩，太淋，唔夠肉味等等支持"和牛唔一定好食"呢個命題

但由於廚師整得唔好，好明顯係廚師問題，唔係塊和牛既問題。

Near

其實呢個圖 唔係代表動態昨咩? (左面個

代表呢條TRACK動態好大 平伏位同最高位 相差 (左面的數字為DB 無記錯)

MP3反而係 壓縮動態

而你講既例子 只係器材未到水準  令原本動態無法有效發揮/表現

咁就要換機了

而市面有好多碟都為左呢樣野 特登將動態壓縮 迎合大眾市場

而你話壓縮左 比 冇壓縮順耳 咁都係極主觀既因素 每人既GEAR都唔同..

(我以前都好似你 咁覺得)

lisztian

Near 發表於 2016-10-14 11:06
其實呢個圖 唔係代表動態昨咩? (左面個

代表呢條TRACK動態好大 平伏位同最高位 相差 (左面的數字為DB 無記 ...

你指既係play back時既器材限制，佢講既係"做"音樂時既限制

如果有玩過錄音同混音，係錄個時PEAK左係冇得無損咁救。但另一個可能係混音時推得太勁，等如錄音peak左既情況，但有時為左個效果，迫住PEAK左都要去，咁唯有做D修飾，如果好似樓主個D PEAK到7彩都出街，就係制作馬虎既成品。

Near

lisztian 發表於 2016-10-14 11:15
你指既係play back時既器材限制，佢講既係"做"音樂時既限制

如果有玩過錄音同混音，係錄個時PEAK左係冇 ...

OH 學到野

不過左面個動態顯示 如個最大值 唔係2 而係更高
咁唔係應該代表 極小值同極大值差好遠咩?~

樓主可能講緊用壓縮 黎修飾爆位

(唔識MIXING 同錄音既野 不過應該同影相爆光位一樣 求指教)